Una lacrima in viaghju

                                               

In a sculuccia posta in pede di u pughjale hè ora di u vesperinu. Di colpu Tuninu sbocca à pienghje. Pienghje chì ùn l’anu messu à pusà à fiancu à a so surella Cicilia. Un lacrimone tamantu, tondulu tondulu è salitu salitu si ne cola pianu pianu nantu à a so maschja.

Quand’ella ghjunghje à l’orlu di a so bocca, Tuninu cerca à chjappà la incù un colpu di lingua. Ma a lacrima schisa a trappula, si ne sguilla sinu à u mentu è puntata da u so abbriu si ne casca nantu à a manica di a sarachetta di u zitellucciu.

 

 

Oh ! Micca per assai, chì chjocca u timpanellu di a recreaziò.
Tuninu di u so curdogliu si ne hè scurdatu. Corre, vultuleghja, tumbuleghja è a so lacrima salita salita, ciambuttata in tutti i sensi si ne fala in pianu à meza corte.
Ohimè chì si mette à piove ! I criampuli correnu à l’aggrottu.
A lacrima di Tuninu si ritrova prestu avvinta da millaie di gocce d’acqua tepida è linda, venute da u celu è chì schillizzeghjanu in pianu aduniscendu si in puzzetti.
Una di quelle gocce s’accorghje di a presenza di a lacrima di Tuninu.
- Quale sì tù ? li dumanda. Ùn ci assumigli micca ! Simu gocce d’acqua linda guasi pura è tù sì salita salita !…
- Sò una lacrima di Tuninu. Sò nata da un singhjozzu tamantu, eppo sò cascata quì, in corte di recreaziò, appena nanzu à a vostra venuta. Chì mi hà da accade ?
- T’avemu da accumpagnà sinu à l’oceanu. A so acqua hè salita cum’è tè, da tutti i pienti, da tutti i curdogli, da tutte de disgrazie di i zitelli, di e donne, di l’omi è di l’animali chì pienghjenu nantu à sta terra da millioni di notte è di ghjorni.
Penserosa, a lacrima di Tuninu hà vistu ingiru à ella u pozzu fattu da e gocce d’acqua inguffià si pianu pianu, sparghje si, eppo scolà si ne bellu bellu ver’di l’acquidottu vicinu.
Quellu si lampa in un guaglinu.

 

 

 

U guaglinu si lampa in fiumicellu, è u fiumicellu si lampa in fiume chì ellu sbocca à l’oceanu.
U viaghju ùn hà micca duratu più di dui ghjorni è a lacrima di Tuninu vede tandu mischjà si e gocce d’acqua linda à e gocce d’acqua salita.
Si senteria bè in l’acque verde di l’oceanu, s’elli ùn ci eranu tutti sti granci, sti pesci ch’elli sianu maiò o chjuchi, è st’alighe chì a si vulerebbenu bieie o rispirà , sti marosuli chì a si scuzzulanu, è st’immensità induv’ella si ritrova sola malgratu tante è tante gocce chì li s’assumiglianu.
Ah ! Sì Tuninu ùn avia avutu stu curdogliu ! S’ellu ùn avia pientu ! Si Seria sempre à l’aggrottu in u veculu di e so pennule di zitellucciu.
Mancheria pocu ch’ella sbucchessi à pienghje dinù ella a lacrima. Infine s’ella pudessi, chì e lacrime ùn pienghjenu micca.
Avà in u celu porgu è turchinu, u sole stende i so raghji ver’di i sprufondi di l’oceanu. Unu di quelli tocca u lacrimone di Tuninu, li face una carezza è u invita à cullà si ne ver’di u lume :
- Veni bella lacrima, veni. S’è tù voli, ti feraghju lena lena è cunnoscerai u ventu, i nuli è u spaziu.
Tandu a lacrima di Tuninu si lascia purtà ver’di u calore di u sole, tralascendu à l’acque di l’oceanu u sale chì a rende pisia è incù millaie è millaie d’altre gocce, si svapureghja in l’aria.
Hè vera chì vistu da quassù, u mondu hè bellu. In u paese di i nuli, e vacche sò appenuccia più grande chè una goccia di guazza, è l’omi ùn sò micca più grandi chè e puce.
Tuttu què face ride a nostra lacrima.
Ma micca per assai.

 

 

Induve serà Tuninu ? In chì scatuluccia chjamata casa, scola o buttega ?
A lacrima torna à esse trista.
Di colpu u ventu gira è si caricheghja di fretu.
E cumpagne di a lacrima di Tuninu chì anu seguitatu incù ella u raghju di sole s’accumpuleghjanu, si stringhjenu sinu à furmà un nulu biancu tamantu.
U ventu si face più forte è u nulu, troppu strettu diventa grisgiu. E gocce è a lacrima ùn ponu più tene. Una à una si lascianu cascà in u viotu. Ed eccu a piuviscata.
A falata si face in furia, à rompichjavette.
I campi, e case, l’arburi ingrandanu à vista d’ochju.
A lacrima chì hè venuta goccia d’acqua, casca ver’di un quadrettu foscu induve elle bollenu tacche di culore minute.
« Sò zitelli ! In una corte di recreaziò ! Mi rammenterà à Tuninu ! » si dice a goccia.
È u so core d’acqua batte di gioia.
Si spiccia, passa indinanzu à tutte e so amiche per ghjunghje a prima in a corte induv’elli ghjocanu i criampuli, prima chì a so maestra i metissi à l’aggrottu.
Induve cascherà  ? Stu zitellu brunu… Tuninu, hè Tuninu in veru !
« Fate ch’eo posca cascà abbastanza vicinu à ellu da pudè lu rivede. »
Tuttu ghjuchendu, Tuninu cambia di direzzione è riceve a prima goccia di l’acquata chì ghjunghje. Bella sigura, ùn ricunnosce micca u lacrimone salitu salitu ch’ellu avia vulsutu chjappà d’un colpu di lingua qualchì ghjornu nanzu. A goccia, felice  di ritruvà à Tuninu, si hè calata incù dulcezza nantu à a so machja, cum’è un basgiu, cum’è una carezza. Sà chì puru s’ella riparte in viaghju sinu à l’oceanu, vulterà quantunque per via di i nuli.
Ùn dice u pruverbiu : « L’acqua volta sempre à i so paesi ! » ?

 

 

Scrittu da Daniel Cabarry. Dissegni Crestian Lamaison.

 

Haut de page