A scola di Satanassu

                                                             

Era a mane, una mane cum’è tutte l’altre è i carrughji di Salamanca cuminciavanu à move si… Ma per u mumentu si pudia sempre sente u silenziu. Saveriu avia apprufittatu di a notte per appruntà un esame è avà stava à sente l’acelli chì fischjulavanu prima chì u sole spuntessi.


A sapia, da quì à un’ oretta, a cità si metteria prima à sussurà è più tardi à mughjà di riminime. Li piacia sta cità. Di fatti, Salamanca era famosa per e so università è e so scole. Ghjè cusì chì i giuvanotti di u mondu sanu ci venianu per ottene un diplomu o per amparà un mistieru.
Saveriu avia avutu u tempu di cunnosce la bè a cità, i so scurnucci, i so citadini, a so storia è e so fole. Ah, iè e so fole ! Saveriu face sempre a boccarisa arricurdendu si d’una fola chì l’era stata conta anni fà.
Un omu l’avia contu chì tempi passatoni e scole di Salamanca eranu ancu di più famose chè oghje. Eranu tantu famose chì Satanassu ellu stessu avia decisu d’apre ne una.

A scola di Satanassu ùn avia nunda di strasordinariu. Ùn s’assumigliava micca à l’altre scole di a cità, invece di custruisce un casamentone incù muri alti, purtelloni è sale di scola, l’Ardiavule preferì fà una scola chì u rispechjessi.
Satanassu facia dunque scola in una grotta. Piatta à u pede d’una muntagna, ci si ghjunghjia entrendu per una una purtuccia. Po seguitendu un curridore strettu strettu si sbuccava in una sala tamanta chì l’aria ci trimava quant’è nantu à a pelle d’un tamburu. Quandu Satanassu facia i so corsi, lasciava ribumbà a so voce pigliendu un gran’ piacè à vede u timore ch’ellu inghjennava.
Certi si dumandanu à le volte à chì s’assumiglia Satanassu. Ma nimu pò risponde. « Hè difficile à dì », dicianu i sculari.
« U pilone neru ch’ellu hà addossu piatta tutta a so persona. Ùn si vedenu chè l’ochji : ochji di focu ».

 

Ma i sculari dicianu dinù chì l’Ardiavule era un bon’ prufessore.
Di fatti, durante ore sane di corsu, ùn si sentia un ansciu. I candelloni posti nantu à i muri facianu lume à i visi chì stavanu à sente incù attenzione.
Dice chì in un annu, Satanassu purtava i so sculari à esse di più struiti ch’è l’altri studienti. Ne facia sapienti. L’amparava tuttu, sinu à a manera di svià i tempurali. È ancu s’ella era periculosa, i sculari ammaestravanu stu sapè è ne eranu fieri.
Ma ci era una contraparte à quellu insignamentu. Ogni annu, compia a scola è toccu l’epica di e vacanze, Satanassu urganizava un rituale stranu.
Unu di i sculari, quellu chì escia l’ultimu da a grotta diventava u servu di l’Ardiavule abbeternu.
Era un vede a furia di i giovani diplumati à l’esciuta generale di a San Ghjuvà ! U so baccu in manu, si puntavanu unu l’altru per esse u prima à esce. Ma a porta era cusì stretta chì una persona sola ci pudia passà. Satanassu era impalaficcatu custì è à misura chì un scularu spuntava dicia : « Stà ti quì, chì sì meiu. »
« Piglia ti à quellu chì mi vene daretu », rispundia u studiente.
È cusì sinu à l’ultimu chì si stava à u seviziu di Satanassu.

 

 

Ora, vense un annu chì, quandu ghjunse a San Ghjuvà, Petru, unu di i studienti visse i so cumpagni tristi. Aspettavanu tutti capicalati chì Satanassu venga à apre li a porta.
Petru era un giuvanottu maliziosu. À l’oppostu di l’altri sculari chì parianu impressiunati da u cuntegnu foscu di l’Ardiavule è da a so voce venuta da un altru mondu, ellu, ùn avia paura di u so maestru.
Li disse :
- Cumpagni mei, s’è vo’ accunsentite à aspettà chì meziornu sunessi per esce da a grotta, tandu di sorte l’ultimu mi và.
Accettonu tutti incù gran’ sudesfu.
À meziornu in zecca, Satanassu aprì a purtuccia. A sfilera principiò. Ben’ chè sullagiti chì Petru si sia prupostu, i studienti parianu quantunque penserosi. È cum’è ogni annu l’Ardiavule si stava impalaficcatu vicinu à a porta. Incù una voce calma è incù l’ochji luccichenti dicia : « Stà ti quì, chì sì meiu ».
Allora, unu dopu l’altru, ogni studiente rispundia : « Piglia ti à quellu chì mi vene daretu», è scappava in furia.
Infine Petru affaccò.
« Stà ti quì, chì sì meiu. », li disse Satanassu.
Ma Petru ùn avia paura. Sapia chì à quellu mumentu, u sole entrava per l’apertura di a grotta è prughjettava a so ombra daretu à ellu.
« Piglia ti à quellu chì mi vene daretu », li disse indittendu li a so ombra nantu à u muru.
Ingannatu, Satanassu si lampò nantu à l’ombra di Petru. Eppo scaccanò quand’ellu capì ciò chì era successu…
« Hè troppu tardi avà » sussurò Petru scappendu si ne à u fora.
Tandu, è tandu solu, Petru capì chì per u restu di a so vita, sole o micca sole, anderia senza ombra.
Allora si misse à ride.
Era liberu. 

 

Haut de page