U nulu di polvera

                                                

                                                         

                                          

                                                          

U sole s’era pisatu nantu à San Antonio di Valero. I indiani cuauiltechi è spagnoli chì campavanu custì principiavanu à destà si. L’agricultori s’appruntavanu à parte in i campi. Tuttu era di calmu è di serenu.

 

Ùn era micca sempre stata cusì. Ma da quandu chì i spagnoli avianu innalzatu muraglie ingiru à a cità, i indiani cuauiltechi si sentianu più sicuri. Sapianu chì altre tribù predighjavanu. È quelle avianu solu un’idea in core : entre in cità per rapinà li. Ma oghje ghjornu a paura era sparita.
Tutti i ghjorni, fora di a dumenica, abbrancavanu carrette pisie à i boi è andavanu sinu à i campi.
Ver’di meziornu ùn si pudia tene da u calore è i indiani cuauiltechi vultavanu in casa soia. Era l’ora di a siesta. Quandi u sole era menu caldu era cum’è una segonda matinata. E donne è i zitelli ne prufittavanu per andà à richjarà si in fiume.

Di quandu in quandu, longu à u fiume, si vidia dui persunagi. Unu viaghjava à cavallu. Si chjamava Ignacio. Era gendarmu di u Rè. U so rollu era di prutege l’abitanti contru à e tribù d’indiani ostile. Venia da una regione misera di u reame spagnolu. A caresima l’avia custrettu à spatrià si è à parte per u Mondu Novu.
U segondu persunagiu era u so amicu, appena cum’è un fratellucciu di soiu ; si chjamava Paeze. Ignacio l’avia amparatu à coglie si à cavallu è l’imprestava a so ghjumenta di quandu in quandu.

Quellu ghjornu caminavanu longu à u fiume, quandu chì, di colpu, a terra si misse à trimà. Ignacio ricunnobbe subitu u galoppu di i cavalli ; seranu una cinquantina, pensò videndu u nulu di polvera ch’elli pisavanu.
Paeze è Ignacio si piattonu in un campu di granone. Vidinu tandu un dimoniu neru tamantu coltu à un cavallu foscu quant’è ellu. Ignacio induvinò subbitu ch’ellu era stu tremendu capimachja di i indiani Cumansci. Quelli chì i spagnoli cugnumavanu “El Diablo Negro”. Da unipochi d’anni i indiani Cumansci s’eranu impatrunati di u Texas. Venuti da u Nordu, avianu cacciatu l’Appasci è facianu trimà di paura l’abitanti di u paese.

 

Ignacio è Paeze capinu subbitu ch’elli andavanu in Bexar, a cità più vicina.
E racolte eranu compie è i Cumansci sceglianu ghjustu stu mumentu per vene à piglià si le.
Tempu passatu u periculu, Ignacio riagì. Anderia à chere aiutu in Bahia : una cità posta à levante. 
Paeze, ellu, decidì d’andà à privene l’abitanti di Bexar. Li pigliò u tardi per buscà si un cavallu ma, per furtuna, era natu quì è cunniscia tutti l’accurtatoghji. “El diablo” pudia puru avè un cavallu lestu ; Paeze ghjunse bellu prima ch’è ellu. Fece tandu u giru di a cità è annunziò a nutizia à tutti :
« I Cumansci ci s’azzuffanu ! »

 

Tantu è più chì quandu “El Diablo Negro” entrì in cità incù i so cinquanta guerrieri, i purtelli eranu tuppi è e porte chjose à marchjoni è stanghittate.
In parechje volte i Cumansci fecenu ciabba tantu l’abitanti si difendianu. Ma più andava è più “El diablo” s’era minacciante... Per furtuna vense a notte. Quella notte chì ùn ne finia più. “El diablo” aspettava l’alba per vultà à l’azzuffu.
Ma à u pisà di u sole i citatini vidinu ciò chì ùn si pudia crede : i guerrieri Cumansci tironu mughjoni ; tandu “El diablo” fece mottu incù a so lancia è tutti i cavallieri fughjinu à galoppu sarratu.
Una brea di gioia è di sullevu si fece sente in a cità.

À l’orizonte, un centu di cavallieri spagnoli ghjunghjianu. Purtati da Ignacio, avianu cavalcatu tutta a notte da pudè succore i so amichi di Bexar à l’alba.
I cavallieri si stipponu à i Cumansci finu à luntanu luntanu à punente. I indiani cuauiltechi capinu ch’elli turnavanu à campà in pace.

 

Stu stalvatoghju hè successu in l’annu di Diu di u 1766.

Haut de page