A marmotta, trè mesi durmendu

A marmotta maiò

pò misurà da 60 à 80 centimitri. Pò campà sinu à 20 anni. Marmotti si ni trova in i Pirrinei, in u Massif Central, ma u più ch’eddu ci n’hè, hè in’ì l’Alpi.
In Corsica, inveci, ùn ci n’hè mai statu.
D’altrondi, a lingua corsa, ùn ci dici micca ”dorma com’à una marmotta ” o “dorma com’à una ghjira” ma ci dice:  dorma quant’à u sacconu”.

 

Semi di branu. In alta muntagna ci hè sempri a nevi, ma più in ghjò, in i prati a virdura s’hè dighjà sparta. Sbucciani i prima fiori è cun eddi si vedini tanti api. Tuttu in un colpu si senti un fiscu chì rompi u calmu è l’armunia abituale di stu locu.
Chì hè statu ? Calchì pastori chì chjama u so ghjacaru ? Nò, hè una marmotta.

Prudenza

I marmotti ani durmitu tuttu l’invernu à u caldu in a so tana. Da ch’eddi si scetani, a prima cosa ch’eddi facini hè di fighjulà ciò chì si passa in i prati à l’intornu. Sò animali prudintissimi, è cusì s’assigurani ch’eddu ùn ci hè nisun’ piriculu.
Ma l’invernu hè statu longu è ci hè a fami vechja, allora facini affacca è capula cù tuttu ciò ch’eddi trovani, radichi, arbi è ancu insetti è lumbrichi.
Mì ! Ci n’hè una chì hà zifulatu par avartiscia d’un piriculu. Avarà avutu a paura di stu gruppu di randunadori, ma avà si sò alluntanati.
I marmotti fighjulani un colpu in aria ch’eddu ùn ci sichi l’acula, è po si mettini in cerca di magnuscula.

 

Nascita

I cateddi marmuttini nascini à a fin’ d’u branu. I marmotti sò mammifari. Pò nascia 6 cateddi à purtata. I chjuchi nascitoghji ùn pesani cà trenta grami. Stani 20 o 30 ghjorni in un nidu d’arba secca in u fondu di a tana. È in issu mentri sughjini a mamma.

 

Magnà bè pà dorma mor’di tempu

À l’auturnu i marmotti ùn facini cà magnà. Cusì ingrassani bè, è si facini una bona riserva di grassa pà pudè invirnà. U so pesu tandu cresci sinu à 8 chilò, è sò pronti à dorma tuttu l’invernu. U so pilamu zeppu ddi farà una bona prutizzioni contru à u fretu, sinu à u prossimu branu.

 

Scrittu è ritratti da Fred Lavail.

Haut de page