A scimia verdi

Addirrizzu: Africa

Pesu d’un individuvu maiori :  da 3 à 7,7 chilò
Lunghezza da capu à pedi : da 40 à 83 cintimitri
Lunghezza di a coda : 50 à 100 cintimitri
Lunghezza di vita : 24 anni

 

 

Vucabulariu

Brucu (masc.) : chenille
Gradivanza : gestation
Pidochju : poux
Spiduchjata :  épouillage
Sughja : téter

 

Dicini ch’edda hè ghjucadora. T’hà un pilamu grisgiu verdi. Campa in Africa in i furesti chjari è i savani.

 

U francesu a chjama ancu vervet.

I scimii verdi passani a mità di a so vita à nantu à l’arburi parchì si movini assai difficilmenti in terra. Campani in bandi d’una vintina d’individuvi, è ùn falani in terra chè par nutriscia si. S’eddu ci hè u minimu piriculu scappani subitu à nantu à u so arburu.

 

 

U so tempu u passani à ghjucà, à buscà si da magnà, è à caccià si i pidochji. Com’edda si pò veda à nantu à u ritrattu inghjò di a paghjina, a spiduchjata si faci cullittivamenti.

 

A scimia verdi hè una spezia d’animali chì si porta bè in Africa.
I pupulazioni sò numarosi è pari ch’eddi ùn sighini micca minacciati.

 

I chjuchi

U chjucu nasci dopu à 6 mesi di gradivanza. Una volta natu, passa 6 mesi sempri cù a mamma chì li dà à sughja. I dui prima mesi s’appittica à i peli di u so pettu, è dopu si coglii à nantu à u spinu di a mamma. Da ch’eddu ci hè un piriculu, accadi suventi chì i mammi sighini aiutati da altri scimii par pruteghja i so fiddoli.

 

 

Li piacini i frutti

A scimia verdi hè amatora di frutti, ma magna ancu bruchi, insetti, casci è fiori, è s’edda li casca di pudè visità un nidu, un acidduchju u si sciacca ancu vulinteri.

 

 

 

Fotos fred Lavail

 

Haut de page