Leunardu da Vinci, inventadore di u paracaduta

 

 

Natu in u 1452 in Italia in Vinci.
Hè mortu in u 1519, in Francia, vicinu à Amboise induv’ellu avia ritrovu u rè François 1u. Avia 67 anni.

 

 

Disimpiecatu

In u 1482, Leunardu da Vinci cerca à travaglià. Manda una lettera di mutivazione à u Duca di Milanu :
« Aghju i secreti chì nimu pussede. Sò a manera di fà custruisce ponti assai leni è facili di trasportu. Possu fà ch’elli resistinu à u focu è à l’assaltu. Cunnoscu u mezu di brusgià i ponti di u nemicu.
Possu fà un cannone chì lenta e materie infiarate, cagiunendu danni maiò è un terrore tamantu.
Possu trapanà passeghji sutterranii senza rimore da fà una strada sottu à i fossi o i fiumi.  
Possu custruisce vitture cuperte chì ùn si ponu strughje. In tempu di pace, sò u paru di qualechissia in architettura. Possu purtà l’acqua da un locu à l’altru. Possu zulcà statule in marmaru, in bronzu, in terra cotta… »
Leunardu hè statu chjappu. Travaglierà à l’età di 16 anni in Milanu, in particulare per a custruzzione di u statulone d’un cavallu in bronzu.

 

Era un sapiente. Ma soprattuttu, era un geniu. Averà avutu un secretu ? Iè, fidighjava u mondu incù un ochju altru. Tuttu per ellu era maraviglia, tuttu li dava da riflette. Era à tempu pittore, architettu, ingeniore, matematicu, musicante è ancu scrivanu. Vulia sapè tuttu, cunnosce tuttu è sopratuttu era cunvintu chì limite ùn avia a cunniscenza.

À 17 anni, Leunardu lascia u so paese. Parte à amparà a pittura in Firenza indè u pittore famosu : Verrochio.
À 30 anni, parte in Milanu. Ci travaglia per un principe : Ludovic Sforza.
À 50 anni, diventa ingeniore militare per Cesaru Borgia, un omu di guerra famosu.
À 60 anni passati parte in Francia. Hè u invitatu di François 1u.

 

Cunquistà u spaziu

Leunardu da Vinci hè u babbu di l’aviazione, di l'eliccotteru, di u paracaduta, di u sottumarinu, di a vittura è ancu di a bissiccletta. Si ritrova tutti sti piani in una racolta ch’ellu hà scrittu è dissignatu ellu stessu. U Codex Atlanticus. In u so manuale Leunardu nota : “incù una tela di forma piramidale chì a basa di 7 metri hè tenuta aperta incù forza, omu si puderà lentà da tutta altura senza nisun risicu.” Ci volerà à aspettà 300 anni da chì a so idea sia realizata. Hè in u 1783 chì u primu saltu in paracaduta serà riesciutu. Si ferà in Francia da in cima à una torra. In quantu à u prima eliccotteru capace di purtà una persona, hè statu messu in ballu da Paul Cornu in u 1907.
 

 

 

 

Leunardu da Vinci in u so attellu.

 

 

 

« Mi piacenu  e scumesse sceme »
Scontru incù  Leunardu da Vinci

 

 

Ùn avete nisun furmazione universitaria è intantu site cunsideratu quant’è un sapiente.

Aghju una manera uriginale di struisce mi. Prima, m’interessu à tuttu è soprattuttu : mirgu… Aghju studiatu l’anatumia, per indettu spezzendu i cadaveri à l’uspidale. U minimu detagliu mi ritene. Mi sò cuntrariatu nantu à u funziunamentu di u core umanu o dinù nantu à u sviliuppu di u fetu per indettu. I mio schema sò precisissimi. I medichi ci ponu tirà e infurmazione.

Ghjè sta manera d’amparà chì vi porta à inventà ?

Ùn mi possu tene. Quandu vecu certi affari, pensu sempre ch’ellu ci serebbe manera di fà sistema più pratichi. Quandu era à u serviziu di u Duca di Milanu, andava à spessu in e stalle da mirà a musculatura di i cavalli. Tandu mi sò figuratu una mansa di sistema. Manghjitoghje chì si serianu empiute da per elle è chì averianu pussutu cambià a sorte di l’animali per indettu.

Ma avete dinù inventatu mascine di guerra ?

Era l’epica. Aghju dinù travagliatu in quantu chè architettu militare durante 10 anni à u contu di Cesaru Borgia. Mi sò figuratu tanchi, bombe, cannoni, catapulte è altre è tante mascine di guerra.

 

Vi piacenu e scumesse appena sceme ?

Mi piacenu più chè più. Vulia fà una statula chì u cavallu seria vistu quand’ellu zerpa. U vulia fà tene in equilibriu quandu ch’ellu misurava
7 metri è 20 in altura, incù u cavallieru, a statula avia da misurà 14 metri. Ci vulia 72 tone di
bronzu ! Era un vede ! Era una scumessa appena scema ma hè què chì mi piacia.

Dice ch’è vo’ scrivite à l’arristrosa per chì omu ùn vi posca leghje, hè vera ?

Si dice assai pazzie. Di fatti, hè una minichichja ch’eo aghju trovu da ùn fà impiastri nantu à i mio manuscritti. Sapete chì à i tempi mei si scrivia incù a penna è u inchjostru. Ora u inchjostru mette u tempu à siccà. Per i manidritti ùn ci hè tanti prublema ma, sò mancinu è scrivendu nurmalamente a mio manu passava nantu à u inchjostru sempre frescu. Tandu aghju trovu sta minichichja. Scrivu da dritta à manca à l’arringuerciu. Tuttu ognunu mi pò leghje aduprendu un spechju. Ma sapete, i Sgiappunesi, i Chinesi, l’Arabi scrivenu dinù elli da dritta à manca !

In fatti site un uriginale !

A ghjente dice ch’aghju u spiritu aventurosu, una cria ribellu, li stuzzica. Li stuzzica ch’eo porti un vestitu rosulu chì fala sinu à e dinochje quandu chì a moda hè à i vestiti longhi… pocu imprema, sò indipendente, ciò ch’eo vogliu ghjè inventà. À mè, a mio brama hè di fà ciò chì l’altri ùn anu ma’ fattu.

 

Haut de page