Aleria, capitale di a Corsica

1. Ghjoca

U bustu di Ghjove.
In capu di u diu si pò vede :
1. dui serpi.
2. corne d’arghjettu
3. bigudì di l’epica.

2. Ghjoca

I rumani sò ghjunti in Corsica chì sò 2000 anni, ci sò stati :
1. 3000 anni.
2. 20 anni.
3. 700 anni.

3. Ghjoca

I Rumani fubbenu i primi abitanti à cullucà si nantu à a piana di u Tavignanu.
1. Hè vera
2. Ùn hè micca vera

 

Risposte : ghjocu 1 : 2 • ghjocu 2 : 3 • ghjocu 3 : 2

 

A NASCITA D’ALALIA. 2500 anni fà, i Grechi di Fucea scalanu in foce di Tavignanu è ci si cullucheghjanu. Pianu pianu ne ghjunghjenu à barattà incù i Corsi. I Fuceani vendenu legnu, ferru, mele, cera à l’altri populi di u Mediterraniu. Barattanu tutti sti prudutti lucali incù prudutti di lussu (ghjuvelli, piatti, bronzu). Alalia diventa una cità impurtante. In tantu, 30 anni dopu, i Truschi alliati à i Cartaginesi provanu à cunquistà Alalia. Finalamente sò i Rumani, in u 259 prima à Cristu, chì si piglianu a cità. U locu u chjamanu tandu Aleria. I Rumani ci steranu 7 seculi. Entrenu in guerra contru à i Corsi è facenu d’Aleria a capitale di a pruvinzia rumana di Corsica.

Bustu in marmaru di Ghjove - Amonu

Stu bustu hè di l’epica chì Aleria era rumana.
Sò più di 2000 anni. Riprisenta Ghjove (diu grecu) è Amonu (diu egittianu) in una sola persona. E corne d’arghjettu ch’ellu porta in capu quant’è a pelle di l’animale nantu à e so spalle sò a stampa di u diu Amonu.

 

Vasu  per u vinu fattu in Atena

Stu vasu data da a fine di u 5tu seculu prima à Cristu (prima à l’epica rumana). Ci podi vede à Diunisu, u Diu di u vinu. Ghjè u giuvanottu chì stà à pusà. U vasu hè largu chì permettia di fà mischji.
Di fatti, u vinu era cunsideratu dinù cum’è una medicina.

 

Visitendu u situ archeulogicu, ti podi figurà Aleria cum’ella era in tempi di i Rumani.

 

Aleria à l’epica rumana

Quandu i Rumani ghjunghjenu in Corsica (in 259 p. à C.), volenu sviluppà u so imperu, tandu entrenu in guerra contru à i Corsi.
Mettenu in ballu cacce à l’omu è i prigiuneri i vendenu cum’è schjavi...
In u 162 p. à C., i Corsi sò sottumessi. I Rumani si piglianu e più belle terre. Sfruttanu e fureste, e mine di piombu è di ramu... d’Aleria ne facenu una basa navale impurtante. A cità diventa u centru ecunomicu di a Corsica.

 

 

 

Sta rubrica hè stata fatta incù l’aiutu di u Cunsigliu Generale di Corsica Suprana è di u sgiò Ottaviani, cunservadore di u museu.

 

Visita à u Museu d’Aleria

 

U forte di Matra

14imu seculu. I Genuvesi custruiscenu u forte. Asconde una piccula reghja di cavallieri chì curanu i stagni è a strada di Corti.
1729. I Corsi si ribellanu. Assaltanu u forte è si piglianu tutte l’arme allucate nentru da i genuvesi.
12 di marzu di u 1736. Teodoru di Neuhoff (quellu chì diventerà rè di Corsica) scala nantu à a marina d’Aleria, li si face un’ accolta sulenne à u forte.
1755. Pasquale Paoli pruclama l’indipendenza di a Corsica. Tandu, in u forte ci si rifugianu i Matra, una famiglia pudente di a regione chì lotta contru à Paoli.
18imu è 19imu seculi. U bastimentu hè occupatu da l’armata eppo da a dugana.
Fine di u 19imu seculu. U forte hè vindutu à una famiglia è ghjova d’abitazione.
1962. Hè classificatu in quantu chè munimentu storicu.
1978. Diventa museu dipartimentale d’archeulugia.
Da u 1979. U forte hè prupietà di u Cunsigliu Generale di Corsica Suprana.

U museu d’Aleria si trova in u forte di Matra. Hè un museu archeulogicu.
Ci si pò vede ogetti è vistighe scuperti in i i scavi d’Aleria.
U podi visità u museu d’Aleria chì hè apertu tutti i ghjorni fora di a dumenica d’inguernu. In più di què l’entrata à u museu ti dà u dirittu di visità u situ archeulogicu.

Ore d’apertura di u forte di Matra
D’estate : da 8 ore di mane à meziornu è da 2 ore à 7 ore di sera
D’inguernu : da 8 ore di mane à meziornu è da 2 ore à 5 ore di sera
Prezzu  :  10 franchi - 1,50 e
Di gratisi per i sculari è i zitelli sinu à 10 anni.

 

Haut de page