Anna di Brittania, pè l’indipendenza di a so terra

Anna hè venuta una légenda

À l’epica d’Anna di Brittania, e fruntiere ùn sò micca quelle d’oghje. A Brittania hè tandu un ducatu indipendente. Simu dopu à « a Guerra di Centu anni » : una seria di guerre chì anu oppostu u rè di Francia à u Rè d’Inghilterra. L’ecunumia si porta bè chì ci sò i porti induv’ellu si face u cumerciu.
Ma u rè di Francia hè di più in più putente è decide di piglià si a Brittania. L’armata brittona si batte contru à l’armata francese ma, menu numerosa, hè scunfitta.
A guerra arruina u paese è parechji sgiò brittoni si mettenu incù i più forti da pudè prutege u so casale.
Tandu, chì una zitella di 12 anni si fessi incurunà duchessa di Brittania per resiste ùn hè micca un fattu banale. Eccu u perchè chì Anna hè venuta una legenda.

 

 

L’ermellinu

L’ermellinu, st’animalucciu di pelame biancu hè u insegnu di a Brittania.
U pelame di l’ermellinu ghjuvava d’urnamentu à e rode di i suvrani o di i veschi. L’animale fù sceltu per insegnu da un duca di Brittania di u XIIIimu seculu. A fola dice chì un ghjornu l’ermellinu, corsu da cacciadori, preferì à fà si tumbà da i cani chè di ciuttà si, per fughje, in u pozzu di fanga induv’ellu averia imbruttatu u so pelame biancu. U dettu di i duca di Brittania hè tandu : « Prima a morte chè a pitigna ». Bella sigura, quelli chì anu rimiratu u cuntegnu di a duchessa Anna l’anu parangunata incù st’animale.

 

Toccu i so 11 anni, lotta per mantene i diritti è l’indipendenza di a Brittania.
À 11 anni quandu li tocca à regisce a Brittania. Incurunata Duchessa di Brittania, decide di luttà per cunservà i diritti di u so ducatu quandu chì u rè di Francia vole cunquistà lu. Anna hè nata u 25 di ghjennaghju di u 1477 in Nantes. À 14 anni diventa regina di Francia. Malgradu tutti i so sforzi, ùn ci riescerà à mantene l’indipendenza di u so paese.
 

 

Anna vene di nasce. Simu di ghjennaghju di u 1477 è a famiglia di i duca di Brittania si ne face una gioia chì incù issa prima criatura, a leva hè assicurata. Di fatti, in Brittania, ùn tocca micca à esse un omu per direge u paese ; una donna pò piglià a curona. Ùn hè micca cusì in tutti i reami. In Francia per indettu ùn sò chè l’omi à diventà rè chì una donna, ancu s’ella hè a primanata, ùn pò micca regnà. Hè ciò chì si chjama a lege salica.

 

Urfanella è chjuccuta

À l’epica di a nascita di a piccula duchessa, a Brittania hè un reame guasi indipendente. Hè vera chì u so babbu ùn si face micca chjamà rè, ma intantu face cum’è s’ellu ne era unu. Face batte muneta, hà un’ armata è mette in ballu un parlamentu brittonu. Porta ancu una curona è face tuttu ciò chì ci vole per parè indipendente da u so vicinu u rè di Francia.
Anna hè cunfidata à una nutrice cum’è l’altri figlioli di sgiò. Una surelluccia venerà ancu à ingrandà a famiglia di i duca di Brittania.

 

 

A scunfitta di l’armata brittona

Tuttu và d’incantu per a giovana duchessa, ma per u so babbu a situazione hè più difficiule. U rè di Francia dice chì a Brittania face parte di u so reame. In u 1488 face guerra à i brittoni. L’armata brittona hè disfatta in Saint Aubin du Cormier è a battaglia face parechji morti.
Francescu II, u babbu d’Anna hè custrettu à suttumette si.  Si morerà qualchì mese dopu lascendu Anna sola chì a so mamma, ella dinù s’era morta.
Chì pò fà allora una giuvanotta di 11 anni, ereda di sta Brittania chì u rè di Francia dice soia ?

 

Anna decide di tramandà l’opera di u so babbu è si face incurunà in quantu chè duchessa di a Brittania. Vole ricustituisce un’ armata è per quessa vende una partita di a so robba persunale. Cunfurtata da qualchì persona di cunfidenza, decide di circà alliati per resiste à u rè di Francia Carlu VII. Decide ancu di marità si, per precura, vene à dì da luntanu incù Massimilianu d’Austria. Per via di issu matrimoniu spera chì u suvranu austrianu li derà una manu è ch’ellu venerà à u so succorsu. A Brittania ùn hà tantu pesu contru à u reame di Francia.

Disgraziosamente Massimilianu hà un’altra guerra à fà : di a sorte di a Brittania è di a so giovana sposa ùn si ne primureghja micca. È cusì, Anna hè sola quandu Carlu VIII, rè di Francia (hà 21 anni), accampa a cità di Rennes. Vitturiosu, Carlu VIII decide chì u matrimoniu d’Anna incù u suvranu austrianu ùn hà nisun valore : È tandu esige di spusà a duchessa brittona.

 

Residenza d'Anna di Brittania - Nantes.

 

Duchessa à 11 anni, regina à 14 anni

Anna hè obligata à accettà. À 14 anni hè fatta sposa di u rè di Francia è ùn hà più nisun putere in Brittania. Intantu in u 1498 (hà 21 anni), u rè Carlu VIII si more è Anna volta in Brittania.
Cum’ella hè stata decisa ch’ella spuseria u successore di Carlu VIII, diventa per a segonda volta a regina di Francia. Ne prufitta per ottene di regnà nantu à a Brittania chì averà a so ghjustizia i so diritti propii. Hè decisa dinù chì a successione venerà à u segondu figliolu di u coppiu.
Ma i fatti ùn sò micca quelli : Claudia, a figliola d’Anna di Brittania è di Luigi XII serà fatta sposa di Francescu Iu, rè di Francia. Quellu si piglierà definitivamente a Brittania in u 1532.
Anna si more in u 1514, ùn averà chè 37 anni.

 

Per u so segondu matrimoniu Anna ottene di regnà nantà à Brittania.
Dissegnu Patrick Berthelot.

 

Ritratti cità di Nantes.

 

Haut de page